தூத்துக்குடி முத்தையாபுரம் அய்யன் கோவில் தெருவைச் சேர்ந்தவர் ராஜ்குமார் மகன் பிரவீன் குமார் (25), இவர் எலக்ட்ரிக்கல் மற்றும் எலக்ட்ரானிக் இன்ஜினியரிங் படித்துள்ளார். நேற்று மாலை 5 மணியளவில் தனது வீட்டில் இருந்தபோது வீட்டுக்குள் புகுந்த ஒரு வாலிபர் இவரை சரமரியாக அரிவாளால் வெட்டிக் கொன்று விட்டுதப்பிச் சென்றுவிட்டார்.
இந்த சம்பவம் குறித்து தகவலறிந்த முத்தையாபுரம் காவல் நிலைய இன்ஸ்பெக்டர் செந்தில்குமார் மற்றும் போலீசார் சம்பவ இடத்திற்கு சென்று உடலை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். மேலும் இது தொடர்பாக விசாரணை நடத்தியதில் ஏரல் அருகே மாரமங்கலம் கிராமத்தை சேர்ந்த செல்லப்பா (27) என்பவர் தனது மனைவி சக்தியுடன் கடந்த மாதம் அய்யன் கோவில் தெருவில் இவர்களது வீட்டுக்கு பக்கத்து வீட்டில் குடி வந்தாராம்.
அப்போது கொலை செய்யப்பட்ட பிரவீன் குமாரின் அண்ணன் வினோத் (30) என்பவருக்கும் செல்லப்பா மனைவிக்கும் பழக்கம் ஏற்பட்டுள்ளது. இதையடுத்து செல்லப்பா தனது வீட்டை காலி செய்து மீண்டும் மாரமங்கலம் சென்று விட்டாராம். இதற்கிடையே இன்று மாலை வினோத்தை கொலை செய்வதற்காக செல்லப்பா அவரது வீட்டுக்கு வந்தாராம்.
அப்போது அங்கு வினோத் இல்லாததால் அவரது தம்பி பிரவீன் குமாரை சரமாரியாக அரிவாளால் வெட்டி கொலை செய்தது தெரியவந்தது. இதுதொடர்பாக போலீசார் வழக்கு பதிவு செய்து செல்லப்பாவை கைது செய்து விசாரணை நடத்தி வருகின்றனர். இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.
